هوَّ كان الرَّابِع
في أتون النَّار الحامي
وِسط الفِتيَة التَّلاتَة
وحُضورُه البارِع
خَلَّى المَلِك يشوفهُم
بيتمَشُّوا بكُل بَساطَة
فيهُم إيمان
غَلَب العَيان
عَلَشان شايفين الله
بِكُل مَخافَة
بيفَكَّروا فيه
يتشَرَّفوا بيه
والنَّار بِقيت مَعاه
أحلى استِضافَة
ويبان إن انتَصَروا
عَليه الأشرار
لَكِن أفكارُه
غير كُل الأفكار
رابِع إلَهي رائِع
بينَجِّي من الأخطار
لَو جُبّ أُسود
وسجون وقُيود
وفي قَلب أتون النَّار
لَو حَتَّى في قَبر الموت
أو في جوف الحوت
هوَّ وجودُه بيفرِق
يكفي انُّه يكون مَوجود
في اليوم الرَّابِع
أنا شُفت يَسوع بيبكي
قُدَّام قَبر لِعازَر
ودَه مات مِش راجِع
والحَسرَة وريحة الموت
مَوجودَة ومالهاش آخِر
لَكِن الإلَه
رَبّ الحَياة
ليه جوَّه قُبور الموت
مَخارِج ياما
كُلُّه في سُلطان
رَبّ الأكوان
عَلَشان هوَّ الحَياة
وهوَّ القيامَة
ويبان إنُّه اتأخَّر
في المِشوار
لَكِن أفكارُه
غير كُل الأفكار
في الهَزيع الرَّابِع
أنا شُفت يَسوع بيمشي
عَلى موج البَحر الهايج
تَلاميذ بِتصارِع
واليَأس كَأنُّه باب
واللِّي بيدخُلُه مِش خارِج
هَدَّى القُلوب
والرِّيح مَغلوب
البَحر وكُل الكون
يطيعوا كَلامُه
ولِأنُّه يَسوع
الخوف مَمنوع
جَبَروت إبليس
بيهرَب مِن قُدَّامُه
ويبان إنُّه شَبَح
واحنا بنِنهار
لَكِن أفكارُه
غير كُل الأفكار