طوبي للي يلهج في الكلمة
مغروس عند مجاري المياه
زي شجرة نعمة وحكمة
جذور حياته حق وحياة
الكلمة عنده هي غذائه
يلهج فيها نهار وليل
وقت حزنه هي عزائه
وفي سجنه هي أساس التهليل
الكلمة للعطشان المية
ترويه وبسببها يتنقي
مفعولها ده مضاد الخطية
وعن شهواته يقدر يستغني
الكلمة عنده هي سلاحه
في فمه وقت الحرب والضيق
هي دليله وسر نجاحه
يحفظها تصونه طول الطريق
الكلمة بيقراها وتقراه
وتكشف اللي جوه مش باين
دي مرايته لو اتلخبط أو تاه
في سطورها مجد الله بيعاين
الكلمة لو تنطقها تشريع
سيف الفم وليها سلطان
أعلنها ده حكم ساري وبديع
ممتد في كل زمان ومكان
الكلمة لو تتجسد يسوع
عند الله من قبل الدهور
عيشها تعيش مثال للجموع
وزيه تكون مصباح ونور