هات كُرسي واقعُد جَنبي وتَعالَ فَكَّر في الإلَه
خالِق الكون والوجود واللِّي أوجَد الحَياة
هوَّ بنَفسُه يبقى صاحبَك
جوَّه ضيقتَك قَبل رَحبَك
وازَّاي ليك كَلام مَعاه زَيّ الأصحاب والإخوات
القرار
عِدّ معايا البَرَكات .. عِدّ معايا البَرَكات
كِتيرَة أمانتُه .. جِديدَة مَراحمُه
عِدّ معايا البَرَكات
هات الآلَة الحاسبَة واحسِب كان في إيدَك قَدّ إيه
لَمَّا فاض عَليك بِخيرُه وشَبَّعَك صَلاح إيديه
إيدُه باركِت ياما جيبَك
ذوقُه غَطَّى ياما عيبَك
إزَّاي ينسى احتياجاتَك اللِّي أرسَل ابنُه ومات
القرار
عِدّ معايا البَرَكات .. عِدّ معايا البَرَكات
كِتيرَة أمانتُه .. جِديدَة مَراحمُه
عِدّ معايا البَرَكات
هات أجِندِة مَواعيدَك وارجَع وقَلِّب في التَّاريخ
مين عالَك مِن يوم ميلادَك ومِش هايسيبَك لَمَّا تشيخ
يخلِف وَعدُه مُستَحيل
رَحمِتُه مِن جيل لِجيل
إزَّاي ينكِر نَفسُه يوم صالِح في كُل الأوقات
القرار
عِدّ معايا البَرَكات .. عِدّ معايا البَرَكات
كِتيرَة أمانتُه .. جِديدَة مَراحمُه
عِدّ معايا البَرَكات
هات أسامي تِليفونَك وافتِكِر النَّاس دي مين
لَمَّا سيدَك بيهُم شَكِّل شَخصيِّتَك طول السِّنين
فيه اللِّي صَلَّى وصام عَشانَك
وبَكى جَنبَك يوم آلامَك
وازَّاي حَوِّل شَرّ ناس لِبَرَكَة ليك واختِبارات
القرار
عِدّ معايا البَرَكات .. عِدّ معايا البَرَكات
كِتيرَة أمانتُه .. جِديدَة مَراحمُه
عِدّ معايا البَرَكات
يُردَّد القرار بعد كل مقطع