سؤال:
واحد بيقول: هل يوجد عقاب للخاطئ على الأرض، وهل يوجد مرض عقابًا على الخطية؟ [1]
الإجابة:
يوجد عقاب لبعض الخطايا لكن ليس لكل الخطايا، لأن لو ربنا عاقب على كل الخطايا لا يخلص أحد وتبقى الحياة كلها عقوبة، عشان كده داود بيقول في المزمور: “إن كنت للآثام راصدًا يا رب، يا رب من يثبت لأن من عندك المغفرة” (مز130). وبيقول: “لا تدخل في المحاكمة مع عبدك فإنه لا يتزكى قدامك أي حي” (مز143). فساعات بعض عقوبات ياخدها الخاطئ على الأرض. والعقوبات دي على أنواع، في عقوبات من ربنا مباشرةً زي ما ربنا عاقب داود على خطيته، زي ما عاقب سليمان إلى آخره…
وفي عقوبات ياخدها الخاطئ من القانون بتاع الدولة. زي أي لص مثلاً يتمِسك، ويتحاكم، ويتقدم للنيابة، وياخذ عقوبة. أو عقوبة ياخدها من المسئولين أيًا كانوا زي تلميذ غش في الامتحان فيلغوا له الامتحان، أو يلغوا له المادة على حسب ما يحصل، أهو خد عقوبة من المسئولين.
وفي عقوبة طبيعية زي خطية معينة تجيب مرض مثلاً. خطية معينة تجيب مرض، والمرض ده عقوبة طبيعية للخطية. وفي عقوبات ربنا يسمح بيها عشان الإنسان يستيقظ لنفسه يعني يستيقظ لنفسه. لكن هذا لا يمنع العقوبة الأبدية التي لا ينجو منها الإنسان إلا بالتوبة. التوبة هي اللي بتمحو الخطية لكن أخدت عقوبة على الأرض، وماتوبتش قاعدة لك ماخدتش يعني ما توبتش مهما عُوقبت لسه قاعدة.
قداسة البابا شنوده الثالث
[1] سؤال أجاب عنه قداسة البابا شنوده في عظة بعنوان “ما هو الحق؟” بتاريخ 12 أغسطس 1992م