سؤال:
لي ابنة عمي وأريد الزواج منها وأهلي موافقون وكذلِك أهلها. ولكن سبب واحد يمنعني هو إن ليها أخوة خُرس وكذلك خالها ووالدها ووالدتها، وأخاف إني أتزوجها يكون نسلها فيه أطفال خُرس بالوراثة؟ [1]
الإجابة:
السؤال ده الأصول الواحد مايتكلمش فيه.
شوفوا من الناحية الكنسية، لا يوجد ما يَمنع. ولكني أسمعُ ولستُ خبيرًا بهذه الأمور إن من الناحية الطبية القرابات الشديدة جدًا بتجيب نسل ضعيف وأحيانًا فيه نسل فيه عاهات. إللي بيطلع نظره ضعيف، إللي بيطلع فيه عاهة مُعينة، إللي بيطلع عقله تعبان. وزي ما في النباتات بنُطعِّم النبات بنبات آخر لكي يعطيه قوة، كل ما يكون النسل قريب قريب قريب قريب جايز بيضعُف. فأنا مش عارف أقولك نَسلك هيطلع إيه؟ لكن يعني كتير من الأطباء بيقولوا نسل القرابات الشديدة وخصوصًا القرابات المُتتابِعة.
يعني مثلًا زي عيلة كل الزواج من نفس العيلة وأولادهم من نفس العيلة وأولادهم من نفس العيلة، بيجي وقت بيضعُف النسل أو بيكون فيه حاجات. لكن يا ريت تِسأل طبيب من بتوع الوراثة لأن أنا بكلمك وانا لستُ شخصًا مُختصًا لا في الوراثة ولا في النِسل ولا في المعوقات ولا حاجات زي كده، لكن كلام بسمعه وأقوله لك والعهدة على الراوي.
قداسة البابا شنوده الثالث
[1] سؤال أجاب عنه قداسة البابا شنوده في عظة بعنوان “إن عشنا فللرب نعيش وإن متنا فللرب نموت” بتاريخ 26 أغسطس 1987م