السؤال:
بيقول: أريد أن أعرف ما هي مستلزمات أو مقومات الخادم الناجح ومقومات الخدمة الناجحة، وكيف أعرف أن خدمتي نجحت أم فشلت بخصوص التربية الكنسية من سن 8 إلى11 سنوات؟ [1]
الإجابة:
ده إحنا عملنا منهج كبير عن الخدمة في الكنيسة كان طول مدة الصيف يا ريتك كنت حضرته، لكن على أي الحالات حاول أن خدمتك تكون خدمة روحية، والأولاد في السن ديه بيحبوا يقلّدوا فيا ريت تكون قدوة صالحة أمامهم؛ كمان مرّنهم على حاجات كتيرة: علّمهم الحياة ما تخليش مجرد دروس حفظّهم صلوات، حفظّهم مزامير، حفظّهم تراتيل زي العيال الصغيرين اللي شوفتوهم قصادكوا.. ما هو في السن ديه.
علّمهم ازاي يحبوا ربنا خلّي أهداف المنهج عندك تكون أهداف روحية، يعني في فرق بين أنك تقول ربنا خلق السما والأرض وخلق الشمس والقمر والنجوم، وفرق بين أنك تقول: من محبة ربنا فينا خلق لنا الشمس علشان ينور لنا النهار يبقى ربطت بين الخلق والمحبة والصِلة بين الله والإنسان، ومن محبة ربنا فينا زيَّن السماء بالنجوم وبالقمر علشان الليل يكون مُضيء أمامنا؛ فيبقى ربطت الخلق بمحبة ربنا ماخلتوش مُنفصل لوحده. علّمهم ازاي يحبوا ربنا.
قداسة البابا شنوده الثالث
[1] سؤال أجاب عنه قداسة البابا شنوده في عظة بعنوان “التجربة على الجبل ج1 – تجربة الخبز”، بتاريخ 3 مارس 1993م