سؤال
واحد بيقول: هل إذا كان طالب جامعي بيستلم مرتب كل شهر من الجامعة وكان البيت محتاج لهذه الماهية، هل يعطي الكنيسة العشور؟ [1]
الإجابة:
أصول أيوة يعطي، دائمًا الذين يُقَصِّرون في العشور هم الذين أَنعَم الله عليهم بإنعامات كثيرة، كان ممكن إن هذا الطالب لا يَتَفَوَّق ولا يأخذ هذه المكافئة الشهرية، فكون إن ربنا ساعده على التَفَوُّق، بعد كدة يقول: الأسرة محتاجة، العشور مش هي اللي هتزَوِّد ومش هي اللي هتنَقَّص.
وعايزكوا تعرفوا إن مش كثرة الفلوس هي اللي بتُغني الإنسان، إنما الذي يساعد الإنسان هو البَرَكَة الموجودة في الفلوس، ساعات بتوجد فيه فلوس كثيرة وما فهاش بَرَكَة وبتضيع والواحد ما يحِسِّش بيها، وساعات توجد فلوس قليلة وفيها بَرَكَة، ويشعر الإنسان إنها زي الخمس خبزات بياخد منها وما بتنتهيش، فكل ما تعطي ربنا، ربنا يبارك في الباقي ويجعله مُثمِر وكثير.
وحق ربنا لا نُجامِل فيه أحدًا، لا نُجامِل فيه أسرة ولا غير أسرة، والأسرة ربنا يساعدها إذا هي احترمت حقوق الله، ربنا بيقول: هاتوا العشور وجَرِّبوني، إن ما كُنتِّش افتح ليكوا السماء وأفيض عليكم بالنِعَم لغاية لما تقولوا: كفانا كفانا.
قداسة البابا شنوده الثالث
[1] سؤال أجاب عنه قداسة البابا شنوده في عظة بعنوان “الرجاء”، بتاريخ 1 فبراير 1974م