سؤال:
واحد بيقول ما الفرق بين ظهور الروح القُدس في العهد القديم، وظهوره في العهد الجديد؟ وكيف كان يظهر الروح القُدس في العهد القديم؟ [1]
الإجابة:
هو لعل السؤال يكون أكثر وضوحًا لما يقول: “عمل الروح القُدس في العهد القديم” بدل ما يقول “ظهور الروح القُدس في العهد القديم”، “عمل الروح القُدس في العهد القديم” بدل ما يقول “ظهور الروح القُدس في العهد القديم”.
يعني مثلًا نيجي في العهد الجديد نلاقي الروح القُدس ظهرَ على هيئة حمامة وقت عِماد المَسيح، وظهر على هيئة ألسنة مِن نار في يوم البنطقستي يوم الخمسين.
لكِن الروح القُدس مُمكِن أن يعمل بدون ظهور، وفي العهد القديم كان الروح القُدس بيعمل بدون ما يظهر الروح القُدس، لكِن عمله هوَ اللي بيظهر. يعني مثلًا: حَلّ الروح القُدس على شاول فتنبأ، أدي علامة ظهوره لكِن مِش شكل ظهوره، والروح القُدس عمل في شمشون الجبار فأعطى له قوة غير عادية. الروح القُدس كان يرِف على وجه المياه كان مِن نتائجه عملية خَلق، لكِن مفيش حد شافه. ففي فرق بين عمل الروح القُدس وظهور الروح القُدس، الروح القُدس كان بيعمل في العهد القديم لكِن مفيش حد شاف الروح كده وقال: أنا شُفت الروح القُدس بالشكل الفِلاني!
قداسة البابا شنوده الثالث
[1] سؤال أجاب عنه قداسة البابا شنوده في عظة بعنوان ” كيف تحب الله” بتاريخ 27 مايو 1992م