سؤال:
واحدة بنت بتقول: إنها طالبة في الجامعة وإن أُعجب بيها واحد من الدكاترة الأساتذة، ونتيجة الإعجاب أصبحت تميل إليه ولكن هو ليس من دينها؛ من دينٍ آخر؟ [1]
الإجابة:
نصيحتي لكي أن تبعُدي عن هذا الإعجاب، وعن هذا الأستاذ وخليكي في حالك ما تضيعيش روحك.. فاهمة الكلام؟ ما تضيعيش روحك.
الزواج بنقول من شروط المرافقة: الموافقة، لازم الاتنين يكونوا متفقين: دين واحد، ومذهب واحد.. يعيشوا مع بعض؛ يروحوا الكنيسة مع بعض.. يتناولوا مع بعض.. يصوموا مع بعض، أولادهم يتربوا تربية دينية واحدة.
لو فكرتي ترتبطي بهذا الإنسان فأي نوع من الارتباط هترتبطي بيه؟ الكنيسة مش هتوافق، فيبقى هترتبطي ارتباط ليس سرًا كنسيًا تعتمده الكنيسة، دي أول حاجة.
أولادك هيطلعوا مش مسيحيين.. ما مسئوليتك عليهم أمام ربنا في اليوم الأخير؟ ثم افرض إنه زهق منك وأحب واحدة تانية؛ يقدر ياخدها إلى جوارك وتبقى قاعدة معاكي وأنتِ قاعدة تحرقي في نفسك وتفلفلي من جوه.
قداسة البابا شنوده الثالث
[1] سؤال أجاب عنه قداسة البابا شنوده في عظة بعنوان “مخافة الله ومحبته” بتاريخ 3 يونيو 1992م