سؤال:
واحدة بتقول: أنا طالبة في الصف الأول في إحدى المعاهد (أحد المعاهد مش إحدى المعاهد) ومشتاقة جدًا جدًا إلى حياة الرهبنة ولكن قد سمعت إن من شروط الرهبنة الحصول على شهادة عُليا؟ [1]
الإجابة:
قبل ما أجاوب على السؤال ده عايز أنبهكوا إلى كلمة أنا سمعت. ياما ناس بياخدوا قرارات على كلمة أنا سمعت وجايز ما سمعه يكون مش مظبوط. فلا تأخذي قرارًا في حياتك على مستوى أنا سمعت.
روحي دير بنفسك، روحي دير إيه؟ بنفسك وقولي لهم. إذا قالوا لك لا نقبل إلا بشهادات عُليا يبقي الدير ده بيقول كده. روحي دير تاني، جايز في دير تاني، جايز. مش هتخشي في أديرة القمة على رأي بتاع الكليات ده، وتخشي في دير على قدك يقبلك يعني.
وأنا أعرف أن في أديرة كتيرة في راهبات مش بتوع شهادات عليا خالص. روحي أحسن بنفسك وشوفي. وكمان يقولوا لك إذا كانوا يقبلوكي وأنتِ طالبة، ولا تستني لما تتخرجي. خليكي على صلة وشوفي الرأي إيه، وكمان عشان السن. هما بيقبلوا لسن مُعينة لما تزيد عن كده يقولوا لك عمرك الافتراضي انتهى.
قداسة البابا شنوده الثالث
[1] سؤال أجاب عنه قداسة البابا شنوده في عظة بعنوان “البر الذي في الداخل” بتاريخ 2 ديسمبر 1992م