سؤال:
واحد بيقول: ما هو سبب العدد سبعة (7) في السماوات، وحتى في الأرض يقولوا سابع أرض، وإن كنا نعلم إن أحد الرسل رأى السماء الثالثة، وعرفنا إن عدد السماوات سبعة؟ [1]
الإجابة:
في المسيحية ما بنقولش إن عدد السماوات سبعة إطلاقًا، العبارة دي تلاقيك سمعتها من حتة تاني.
في المسيحية ورد ذكر السماء الثالثة التي صعد إليها بولس الرسول، لعل السماء الأولى هي سماء الطيور والطائرات اللي بتسبح فيها الطائرات والطيور.
والسماء الثانية هي الفلك اللي موجود فيه الشمس والكواكب، والسماء الثالثة هي الفردوس اللي اتصعد إليها بولس الرسول، لكن الكتاب المقدس قال لنا حاجة اسمها (سماء السماوات) (سماء السماوات)، يعني لو كل السماوات ديه المادية اُعتبرت كأنها أرض يبقى دي السماء بتاعتهم، وهي السماء اللي قال عليها السيد المسيح في العظة على الجبل: “لَا تَحْلِفُوا بِالسَّمَاءِ لأَنَّهَا كُرْسِيُّ اللهِ” (مت5: 34)، وهي السماء اللي ورد عنها في (يو٣: ١٣) في كلام المسيح مع نيقوديموس “لَيْسَ أَحَدٌ صَعِدَ إِلَى السَّمَاءِ إِلاَّ الَّذِي نَزَلَ مِنَ السَّمَاءِ، ابْنُ الإِنْسَانِ الَّذِي هُوَ فِي السَّمَاءِ” (يو3: 13)، فدي ما حدش طلع لها أبدًا ولا إيليا ولا أخنوخ ولا حد أبدًا، دي اللي اسمها سماء السماوات.
لكن أزيد من كده ما جاتش سيرته أبدًا في الكتاب المُقدس، لكن العدد ٧ بيرمز للكمال، وبيُستخدم في أشياء كثيرة خاصة بالكمال، وأنا كلمتكوا كتير عن الرقم ٧ ونشرت لكوا مقالات عن العدد ٧ ما فيش داعي نُكرر هذا الكلام.
أما حكاية مثل (يخفس بيه سابع أرض)، ده كلام عوام لكن ما فيش سابع أرض يعني دا كلام عوام، ما فيش حاجة اسمها سابع أرض دي، يعني يقصد غويط قوي واصل لتحت يعني، لكن ما فيش سابع أرض.
قداسة البابا شنوده الثالث
[1] سؤال أجاب عنه قداسة البابا شنوده في عظة بعنوان “الوسائط الروحية – شروط الخدمة الناجحة” بتاريخ 1 يوليو 1992م