سؤال:
واحد بيقول: أنا على وشك الخدمة بفصل إعداد خدام، ولكني سمعت من أبي الكاهن إني لا بد أن أكون مَدعوًّا من الله؟ [1]
الإجابة:
اسأل أباك الكاهن وقول له: الدعوة دي يكون شكلها إيه؟ يعني يكون شكلها إيه؟ هل ييجي لك صوت إلهي، ولا ييجي لك حِلم، ولا ييجي لك رؤية، ولا ييجي لك حاجات من النوع ده؟ طبعًا ما أظنش يقصد كده.
في اعتقادي إن الأب الكاهن قال لك كده ربما زي ما بتقول في بقية خطابك: إن حياتك الروحية سيئة، فيعني بيقول لك: بلاش دلوقتي، استنى لما تتصَلَّح. وأعتقد إن لو اتصَلَّحِت حياتك الروحية، أب اعترافك هيوافق.
والدعوة الحقيقية للخدمة ممكن تكون من الكنيسة، يعني الكنيسة ترسله، لأن بيقول: “وَكَيْفَ يَكْرِزُونَ إِنْ لَمْ يُرْسَلُوا؟” (رو10: 15)، فإذا الكنيسة أرسلتك للخدمة تعتبر دي دعوة من الله، وعلامتها داخل القلب: محبة كبيرة جدًا للناس في غير انحراف، مع مواهب تُساعد على هذا، مع معرفة وحكمة.
لأن فيه ناس بغير معرفة يندفعون في الخدمة فيَضُرُّون أنفسهم ويَضُرُّون الخدمة، وعن هؤلاء قال معلمنا يعقوب: “لاَ تَكُونُوا مُعَلِّمِينَ كَثِيرِينَ يَا إِخْوَتِي، عَالِمِينَ أَنَّنَا نَأْخُذُ دَيْنُونَةً أَعْظَمَ! لأَنَّنَا فِي أَشْيَاءَ كَثِيرَةٍ نَعْثُرُ جَمِيعُنَا” (يع3: 1-2).
قداسة البابا شنوده الثالث
[1] سؤال أجاب عنه قداسة البابا شنوده في عظة بعنوان “الروح القدس وعمله في الإنسان” في كنيسة مار مرقس بمصر الجديدة، بتاريخ 9 أبريل 1981م