سؤال:
واحد بيقول هل كل الأحلام من الله لأن كل ما بحلم حلم لا بد يتحقق وبسرعة؟ [1]
الإجابة:
ما تخدهاش قاعدة، جايز يحصل لك إن أحلام تتحقق لغاية لما تصدق كل الأحلام، وبعدين الشيطان يعرف أنك أنت صدقت الأحلام يبتدي يجيب لك حلم من عنده يضيّعك بيه، فخليك حكيم والمسألة عايزة إفراز وفهم وحكمة، مش كل الأحلام من ربنا… في أحلام من ربنا زي ما أوحي إلى يوسف النجار أن يأخذ الطفل ويذهب إلى مصر (مت2: 13)، وحلم تاني إنه يرجع من مصر (مت2: 19)، زي الحلم للمجوس أنهم ما يرجعوش يقابلوا هيرودس (مت2: 12)، زي الأحلام اللي فسرها دانيال النبي، زي الأحلام اللي فسرها يوسف الصديق، إلى آخره.
لكن في أحلام من الشيطان، وفي أحلام مترسبة في العقل الباطن، في النفس، تكون أنت بتحب حاجة تحلم بيها، بتخاف من حاجة تحلم بيها، حصلت لك حادثة معينة ثبتت في مخك تحلم بيها، إلى آخره. لكن مش معناها أهي دي لا من الشيطان ولا من ربنا من عقلك الباطن الحاجات المترسبة في عقلك، واحد يقرأ حاجات كتير قوم الحاجات اللي يقرأها تثبت في مخه يحلم بيها، فمش كل الأحلام من ربنا واحترس من الأحلام ما تصدقهاش كلها إن حاجة عجبتك أهو كان بها، لكن ما تصدقش برضو.
قداسة البابا شنوده الثالث
[1] سؤال أجاب عنه قداسة البابا شنوده في عظة بعنوان “الجلوس مع النفس ومحاسبتها بمناسبة الصوم– الاعتراف” بتاريخ 22 مارس 1992م